Plac'h ar gwele kloz

Ne blij ket de’hi ar rozenn

’Blij ket de'hi ar valafenn

Nag ar c’helc’h, nag ar garrezenn,

Nag ar chal nag an dichal

’Met, trouz he gwaz o tiroc’hal

Ne blij ket de’hi an iliav,

Nag ar vuhez, nag an Ankoù,

Na liorzh an avaloù,

Nag ar chal nag an dichal

’Met, trouz he gwaz o tiroc’hal

Ne blij ket de’hi al lili,

Strak ar mor war ar bili

Nag ar c’hirri, nag ar bigi,

Nag ar chal nag an dichal

’Met, trouz he gwaz o tiroc’hal

Ne blij ket de’hi an askol,

Na telenn, na treujenn-gaol,

Nag al loar, nag an heol,

Nag ar chal nag an dichal

’Met, trouz he gwaz o tiroc’hal

Ne blij ket de’hi ar pempiz,

Na tourmant, nag avel-viz,

Na Babilon, na Kêr-Is,

Nag ar chal nag an dichal

’Met, trouz he gwaz o tiroc’hal

Savet gant : Bernez Tangi